Sustení pa e sekretario di estado di SZW e periodo aki, riba 18 di yüli 2013 a wordu firmá un deklarashon di intenshon, aneks un akuerdo di kolaborashon, pa empleadónan, sindikatonan i e Entidat Públiko Boneiru.
E diálogo aki a resulta un proseso difísil, a pesar di un bishita di trabou di e partínan na Hulanda na 2015, kulminando den un estankamentu kompletu for di final di 2017.
Den nan karta di 28 di febrüari 2018, BBE, BHG, Kámara di Komèrsio i USIBO a abogá pa desaroyo di un konsultashon significativo entre partnernan sosial i gobièrnu. BONHATA i OLB tambe tabata di opinion ku mester hasi un intento nobo pa revitalisá e DS.
E Ministerio di SZW a propone despues pa nombrá un guia di proseso independiente. Tur partí a bai di akuerdo, despues di kua riba 2 di yüli 2018 Jan-Willem van den Braak (bibá na Den Haag, unda el a traha hopi aña den “de polder”) a wordu nombrá komo tal.
Den siman di 20 di ougùstùs, e guia di proseso a tene kombersashonnan extensivo ku representantenan di tur partínan involukrá, i tambe ku algun partí indirektamente involukrá.
Esaki a tuma lugá tur biaha huntu ku Johan Breure, e koòrdinadó di SZW pa Karibe Hulandes, den su rol komo sekretario.
Tur e kombersashonnan tabata karakterisá pa un kompromiso konstruktivo di parti di e partisipantenan, for di e realisashon ku un bon Diálogo Sentral por kontribuí hopi na nan mes influensia i posishon, i tambe na bienestar di Boneiru, mas allá di diferensianan.
Tambe tur a rekonosé ku Gobièrnu Hulandes (spesialmente SZW) mester tin un rol den e DS.
Riba 10 di òktober 2018 e guia di proseso a presenta un rapòrt na tur partí ku un análisis di e situashon i rekomendashonnan pa un reinisio di e DS.
Tokante esaki riba 15 di novèmber 2018 a tuma lugá un Mesa Rondó ku tur partí na Hotel Marriott Courtyard.
E deliberashon a resulta den firmamentu komun di un protokòl i reglamento pa e Diálogo Sentral, despues di kua a sigui un konferensia di prensa komun.
E gezaghebber a referí na esaki komo e “Akuerdo di Zoutpan”.
Tambe a wordu disidí ku e guia di proseso lo aktua durante un periodo limitá komo vice-presidente di e Diálogo Sentral.
E DS ya a aprobá informenan anual tokante 2019 i 2020.
For di 5 di mart 2021, Jan-Willem van den Braak a wordu supla pa Mervyn Stegers komo vice-presidente i Johan Breure pa Marga Buys-Trimp komo sekretari.
Nan dos a wordu nombrá pa e SD pa dos aña, esta te ku dia 5 di mart 2023.